HOT NEWS : Maris Racal and Anthony Jennings reunite after controversy

maris racal anthony jennings incognito fancon

Tuluy-tuloy pa rin ang MaThon loveteam ngayong 2025 matapos masangkot sa isa sa pinakamalaking kontrobersiya noong 2024.

Sa kauna-unahang pagkakataon ay nakitang magkasama muli ang magka-loveteam na sina Maris Racal at Anthony Jennings matapos masangkot sa cheating allegation noong December 2024.

Kasama sina Maris at Anthony ang co-stars nila sa upcoming Kapamilya action-drama series na Incognito na sina Daniel Padilla, Richard Gutierrez, Ian Veneracion, Baron Geisler, at Kaila Estrada, na dumalo sa fancon na ginanap sa Vista Mall sa Taguig City noong Martes, January 7, 2025.

Mukhang pinahupa lamang ng Star Magic, talent management arm ng ABS-CBN, ang isyu bago palabasin muli sa publiko ang dalawa.

Bagamat kasama rin sina Maris at Anthony sa Metro Manila Film Festival (2024) official entry na And The Breadwinner Is…, na pinagbibidahan ni Vice Ganda, hindi sila isinama sa promotion ng pelikula.

Ipinagpapalagay na dahil mainit at sariwa pa ang isyung kinasangkutan nila, bunsod ng rebelasyon ng ex-girlfriend ni Anthony na si Jam Villanueva na nagkarelasyon ang aktor at si Maris habang sila pa, kaya hindi sila nasilayan sa mga aktibidad kaugnay ng promo ng pelikula.

Hindi rin nasilayan sina Maris at Anthony sa iba pang activities ng ABS-CBN, kagaya ng Christmas special ng Kapamilya network sa Araneta Coliseum noong December 10, at sa Christmas party ng Incognito noong December 20.

Maris Racal reactivates Facebook after controversy with Anthony Jennings - The Filipino Times

MATHON INTERACTION AT INCOGNITO FANCON

Matapos ang isang buwan mula nang pumutok ang pasabog na rebelasyon ni Jamela at maglabas ng public apology sina Maris at Anthony, tila handa na ang MaThon loveteam na harapin muli ang publiko at ipagpatuloy ang kanilang trabaho.

Sa mga lumabas na larawan at video na kuha sa Incognito fancon, makikitang magkatabi sina Maris at Anthony.

Kasama ng kanilang co-stars, masaya silang nakikipag-interact sa mga tagahangang dumalo sa event.

May ilang videos ding lumabas sa X (dating Twitter) kung saan nagtitinginan ang dalawa, at inaalalayan ni Anthony si Maris pag-akyat at pagbaba sa stage.